top of page
Blason_Gascogne.png
Qual sèm ?

     La Federacion « Hautbois &Cie » es estada creada en julhet de 2019 per tal de respondre a l'enjòc de la pérennizacion de las practicas d'autbòis populars de la Region Occitània.

 

     D'efièch, aquesta abriga nòu autbòis originaris de nòu departaments. An cadun una organologia e un repertòri especifics en avent d'elements en comun. En França, la region Occitània es la sola a aculhir una tala diversitat d'autbòis populars. Se los crosa dins de nombroses eveniments totjorn plan populars, tals coma las ajustas nauticas, las Festas màger, los carnavals o las sortidas d'animals totemics, per citar pas qu'eles.

 

     La practica d'aqueles instruments a conegut una relança importanta dins las annadas 1970 e 1980. De talhièrs de factura instrumentala son estats obèrts, de corses e d'espacis de transmission an espelit que siá en Arièja, dins Tarn, Òlt, sul litoral lengadocian, dins los Pirenèus catalans o a las pòrtas de Gasconha.

     Pasmens, tot rèsta encara a considerar per perennizar la practica d'aqueles instruments passaires de lenga(s) e de cultura(s) que patisson sovent d'una manca de coneissença o de consideracion. La Federacion desira donc, per la siá accion, contribuïr a promòure e desvolopar aquelas practicas en se basant sus l'escambi e la mesa en comun, sus la transmission de competéncias, de sabers e d'experiéncias dins l'encastre del patrimòni cultural immaterial, en contribuïssent al desvolopament de las practicas actualas.

De què volem?

     Atal, « Hautbois &Cie » a per tòca la valorizacion, la transmission e la promocion dels autbòis dins lors diversitats e lors practicas tant tradicionalas coma créativas.

 

     Dins un esperit festiu, de partatge, de convivéncia, vòl agir per la recèrca, la conservacion, la formacion, la comunicacion, la difusion, lo sosten a la créacion e la mesa en ret dels actors de l'autbòi.

     Per aquò, a creat de grops de trabalh sus las prioritats que s'es balhadas. Son obèrts a totes :

– factura instrumentala

– educacion, pedagogia

– animacion de la ret, vida culturala

- Patrimòni Cultural Immaterial (PCI)

- comunicacion

– administracion

 

Se reconeis dins las valors de l'educacion populara.

ecu catalan.png
ecu-france.png

La federacion

bottom of page